В се же лѣто поча рать копити Всеславъ. В се же время бысть знамение на западѣ: звѣзда привелика, луцѣ имущи акы кровавы, въсходящи с вечера по заходѣ солнецьномъ; пребысть же днии 7. Се же проявляше не на добро: по семъ бо быша усобица многы и нашествие поганых на Рускую землю; сиа бо звѣзда бысть акы кровава, проливающи кровопролитие. В се же время бысть дѣтище ввержено в Сѣтомль; сего же дѣтища вывлекоша рыболовы в неводѣ, егоже позоровахомъ до вечера, и пакы ввергоша и в воду, понеже бо бысть у дѣтища того срамнии удове на лици его, и иного нелзѣ бяше сказати срама ради. Пред сим же временемъ и солнце премѣнися, и не бысть свѣтло, нь якоже мѣсяць бысть, егоже невѣгласи глаголют снѣдаемому сущу. Се же бывают сица знамениа не на добро; мы бо по всему разумѣемъ, якоже древле при Антиосѣ въ Иерусалимѣ ключися внезапу по всему граду за 40 днии являтися имъ на въздусѣ на конех рыщющимъ въ оружьи, одежи златы имущимъ, полкы обавляемыи оружиемъ дъвижющимся: се бо проявляше нахождение Антиохово, нашествие рати на Иерусалимъ. Посем же при Неронѣ въ Иерусалимѣ восиа звѣзда образъ копииныи надъ градомъ: се же проявляше нахожение рати от римлянъ. И пакы сице же бысть при Устианѣ цесари, звѣзда восиа на западѣ, испущающе луча, еюже прозываху блистаньницю, и бысть еи сѣяющи за 20 днии; посемь же бысть звѣздамъ течение с вечера до утриа, яко мнѣти всѣмъ, яко падуть звѣзды; и пакы солнце безъ лучеи сѣяше: се же проявляше крамолы, недузи человѣкомъ, и умертвие бяше. Пакы же при Маврикии цесари бысть сице: жена роди дѣтище безъ очью и безъ руку, в череслахъ бѣ ему рыбеи хвостъ прирослъ; а песъ родися о 6 ногъ; въ Африкии же два дѣтища родистася: единъ о 4-хъ ногъ, а другыи о двою главу. Посемь же бысть при Костянтинѣ иконоборци, сына Леонова: течение звѣздъное на небеси бысть, отторгахуть бо ся на землю, яко видящимъ имъ концину мнѣти; тогда же и въздухъ вознѣяся по велику; и в Сурии же бысть трусъ великъ, земли разсѣдъшися трии поприщь, и абие изиде изъ земли дивно мьска, человѣческымъ гласомъ глаголющи, проповѣдающи наитие языкомъ, еже и бысть: наидоша бо срачина на Палестиньскую землю. Таковая же знамениа, еже бывают въ небеси, или въ звѣздах, или въ солнци, или птицами, или етеромъ коимъ, не благо бываеть; сице же есть се на зло бываеть, или проявление рати, или гладу, или смерть проявляет.

А в се же лѣто Всеслав рать почал. В си же времена бысть знамение: на западѣ звѣзда велика, лучя имущи кровавы, всходяще с вечера по заходѣ солнчнѣмь, и пребысть за 7 днии. Се же проявляшеся не на добро; по сем бо быша усобица многа и нашествие поганых на Русскую землю; се бо звѣзда бѣ аки кровава, проявляющи кровопролитие. В си же времена бысть дѣтищ ввержен в Сѣтомль; егоже дѣтища вывлекошя рыболове в неводѣ, егоже позоровахом до вечера, и паки ввергоша и в воду, бяшет бо сиць: на лици ему срамнии удове, а иного нелзѣ сказати срама ради. Пред сим же временемъ и солнце премѣнися, и не бысть свѣтло, но яко месяць бысть, егоже невегласи глаголють снѣдаему сущу. Се же бывают сицева знамениа не на добро; мы бо по сему разумехом, якоже древле при Антиосѣ въ Иерусалимѣ, и лучися внезапу по всему граду за 40 днии являтися на въздусѣ на коних рыщущимъ въ оружьи, златы имущи одежди, и плъкы обоя являемы, и оружиемь двизающимся: се же проявляше нахожение Антиохово, нашествие рати на Иерусалимь. По сем же при Неронѣ цари в том же Иерусалимѣ възсиа звѣзда въ образ копеиныи над градомъ: се же проявляше нахожение рати от римлян. И пакы сице же бысть при Иустианѣ цари, звѣзда възсиа на западѣ, испущающи лучя, юже прозываху блисталницу, и бысть блистающи 20 днии, по сем же бысть звѣздамь течение с вечера до утриа, и мнѣти всѣмь, яко падают звѣзды; и пакы солнце без лучь сиаше; по сем бо крамолы человекомъ и умертвиа бяше. Пакы же при Маврикии цари бысть сице: жена дѣтищь роди без очию и без руку, в чреслех бѣ ему рыбеи хвостъ прирослъ; песъ родися о 6 ногъ; въ Африкии же два дѣтища родистася: единъ о 4 ногах, а другыи о двою главу. По сем же бысть при Констянтинѣ иконоборци, сына Леонова: течение звѣздное бысть на небеси, оттръгаху бо ся на землю, яко видящимь имъ мнѣти кончину сущу; тогда же и въздухъ възниася повелику; в Сирии же бысть трус велик, земли разсѣдшися 3 дни и поприщь, и изыде дивно из земли, мска человечьскым гласомь глаголющи, проповѣдающи нашествие язык; еже и бысть, наидошя бо срачини на землю Палестинскую. Знамениа бо в небеси, или въ звѣздах, или в солнци, или птицами, или инѣмь чимъ, не на благо бываеть; но знамениа такова на зло бывают: ли проявление рати, ли глад, или смерть проявляеть.