Того же лѣта бишася Олговичи с Володимеричи, бѣша съ Олговичи половци, и побѣгоша половци, и погнаша по них Володимеровичи, сѣкуще я. В то же время Олговичи переяша стягъ Ярополчь. Сии же иссѣкоша поганыя, възвратишася на полчище и впадоша в руцѣ Олговичемъ. Тогда же яша Олговичи бояръ много, и тысяцькаго Давыда Яруновича, и Станислава Добраго Дутьковича, а внукъ Владимерь и Василко Мариинъ убиенъ ту, а Володимеричи приидоша Киеву, Ярополкъ, Юрьи, Андрѣи, а Олговичи Чернигову. И послаша по половци, и почаша воевати по Сулѣ, и бысть пагуба велика посуляномъ. Ярополкъ совокупи вои мнози, ростовци, полочаны, смоляняне, угра, галичанъ, берендѣевъ бѣ 30000, кияне, переяславци, туровичи, и бысть множество вои, и поиде къ Чернигову. Черниговци же въспиша къ Всеволоду, глаголюще: «Мыслиши бѣжати в Половци, да к чему ся увернешь. Луче остани своего высокоумия и проси мира. Вѣмы, яко не хощеть Ярополкъ пролити крови крестьяньскыя: милосердъ есть и смиренъ Бога ради. Тои бо съблюдаеть Рускую землю». И Всеволодъ же то слышавъ, яко вниде вся, и посласта с покорениемъ и с поклономъ. И прия молбу его Ярополкъ, и створи миръ, и дары взя многы, и возвратися, и вои отпусти вся. А Олговичи взяша Треполь и Халѣпъ.

Того же лѣта послаша по Юриа Володимерича Долгорукого, онъ же дасть имъ сына своего Ростислава, изъ Суждаля, княжити. Идущу же ему къ нимъ, въ то время пополошишася людие, сългаша бо, яко Святополкь у города съ плесковичи; и высунушася весь городъ кь Силнищу, и не бысть ничтоже. Тогда же новогородци смиришася съ плесковичи. А Святославу бѣжащу изъ Новагорода, яша его на пути Смолняне, и стрежаху его на Смядинѣ въ манастыри, а княгиню его приаша въ Новѣгородѣ съ лучшими людми; а Святослава ведоша вь Киевь къ Ярополку. И Всеволодъ Олговичь приведе половци, и нача воевати по Сулѣ, и слыша яко ять бысть братъ его Святославь, и хотѣ ити кь Киеву; а великому киязю тогда Ярополку многы воа съвокупившу, онъ же вьзвратися кь Чернигову, и князь великии поиде на нь кь Чернигову. Всеволодъ же посла къ нему смирениемь и съ мольбою и з дары; князь же великии Ярополкь приа молбу его, и сътвори съ нимъ мирь, и воа распусти.

Того же лѣта слышавь князь великии Изяславъ Мъстиславичь, поиде и з братомъ Володимеромъ, и съ всѣми вои своими; и отъ Вячеслава прииде ему помочь изъ Володимеря. Дошедшимъ же имь Чръныи Могылы, и ту прииде къ нему братъ его Ростиславь Мьстиславичь съ Съмолняны и съ множествомъ вои, и оттолѣ поидоша съ нимъ къ Сулѣ. Они же слышавше поидоша оттолѣ кь Глѣблю, и кь Всеволожу и кь Чернигову; Изяславъ же, братъ его, слышавъ то, поиде за ними, и пришедъ кь Всеволожю, взяша его. Тоже слышавше прочии грады, Унѣжь, и Бѣлавежа и Бохмачь, и побѣгоша къ Чернигову, и иныи мнози грады; и постигше же взяша три тыя грады, а прочии уидоша, а грады зажгоша, а Глѣбльци отбишася. И поидоша оттуду х Киеву, и оттуду Ростиславъ иде кь Смоленьску; Олговичи же и Давыдовичи послаша, Брягинь повоеваша. Глѣбъ же Юриевичь шедъ заятъ Градокъ отца своего, и ту прииде на нь князь великии Изяславь, онъ же убоявся и доби ему челомъ, и кресть цѣловавъ възвратися кь Киеву; Глѣбь же посла кь Давыдичемъ, рекъ: «по неволѣ есми цѣловалъ великому князю Изяславу, а съ вами хощу за одинь быти одинако.»