В лѣто 6581 [1073]. Въздвиже диавол котору в братьи сеи Ярославичех. Бывши распри межи ими, быста собѣ Святослав съ Всеволодом на Изяслава. И изыде Изяслав ис Киева, Святославъ же и Всеволод внидоста в Киев, марта 22, и сѣдоста на столѣ на Берестовѣм, преступивше заповѣдь отца своего, Святославъ же бѣ начало изгонению братню и желаа большая власти; Всеволода бо прелсти, глаголя, яко Изяслав сватится съ Всеславом, мысля на наю; да аще его не остережевѣся, имать ны прогнати. И тако взостри Всеволода на Изяслава. Изяславъ же иде в Ляхы съ имѣнием многым и с женою, уповаа на множество богатства, глаголя: Сим налѣзу плъкъ собѣ в помощь. И взяша все ляхове у него, и показавше ему путь от себе. А Святославь сѣде в Киевѣ, прогнав брата своего, преступив заповѣдь отца своего, паче же Божию. Велии бо есть грѣх преступающим заповѣдь отню; ибо исперва преступишя сынове Хамови на землю Сифову и по 400 лѣтех отмщение приашя от Бога; от племене бо Сифова суть евреи, иже избивше Хананѣиско племя, въсприашя свои жребии и свою землю; и пакы преступи Исав заповѣдь отца своего, и прия убииство; не добро есть преступати предѣла чюжаго. В се же лѣто основана бысть церковь Печерская игуменом Феодосиемь и епископом Михаилом, митрополиту Георгию тогда сущу в Грецѣх, а Святославу в Киевѣ.

В лѣто 6581 [1073]. Въздвиже дияволъ котору въ братии сии, Ярославичехъ. Бывши распря межи ими, бывъ себе Святославъ со Всеволодомъ на Изяслава. Изыде Изяславъ ис Киева, Святославъ, Всеволодъ внидоста в Киевъ месяца марта въ 22 и сѣдоста на Берестовомъ на столѣ, преступивше заповѣдь отню. Святославъ же бѣ начало въгнанию братню, желая болшая власти, Всеволода прельсти, глаголя, яко «Изяславъ свадится съ Всеславомъ, мысля на ня. Да аще его не попредимъ, имать наю прогнати». И тако възостри Всеволода на Изяслава. Изяславъ же иде в Ляхи съ имениемъ многымъ и съ женою, уповая богатеством многымъ, глаголя, яко «симъ налѣзу воя». Еже все взяша ляхове у него, показавше ему путь от себе.

О изгнании Изяславли. Въ лѣто 6581 [1073]. Въздвиже врагь диаволь вражду вь Ярославичехь. Бывши распри межи ими, быста заединъ Святославь съ Всеволодомъ на великого князя Изяслава; князь же великыи Изяславь изыиде ис Киева и бѣжа въ ляхы, Святославъ же и Всеволодъ вниидоста вь Киевь, мѣсяца марта вь 22 день, и сѣдоста на столѣ на Берестовомъ, преступивше заповѣдь отца своего. Святославъ же бѣ начало выгнанию братию, желаа болшаа власти; Всеволода бо прельсти, глаголя: «яко Изяславь единяется съ Всеславомъ, мысля на наю; да аще его не попредимъ, имать на прогнати»; и тако възостри Всеволода на Изяслава. Изяславъ же иде въ ляхы съ имѣниемь многымъ и съ княгынею, уповаа богатствомъ многымъ, глаголя: «яко симъ налѣзу воа»; еже вся взяша у него ляхове, показаша ему путь отъ себе.